Дзяржынская цэнтральная раённая бібліятэка адзначыла 155-гадовы юбілей пісьменніка-земляка Каруся Каганца літаратурным квэстам “Свяціў народу, пакуль мог”. Яго ўдзельнікі, вучні 9 класа ДУА “Гімназія №1 г. Дзяржынска”, актыўна адказвалі на пытанні і даведаліся шмат цікавых фактаў пра жыццё і творчасць юбіляра, талент якога праявіўся яшчэ і ў выяўленчым мастацтве і скульптуры. З натхненнем моладзь чытала вершы аўтара, складвала пазлы з малюнкаў Каруся Каганца, з захапленнем знаёмілася з “Беларускім лемантаром” – першым беларускім букваром, аўтарам тэксту і малюнкаў якога быў менавіта наш зямляк.

Сюрпрызам для ўсіх стаў паэтычны тур квэста, дзе вучні сустрэліся з членам Саюза пісьменнікаў Беларусі, удзельніцай народнага літаратурнага клуба “Выток” Людмілай Круглік. Яна прэзентавала моладзі свае вершаваныя пераказы паданняў пісьменніка-земляка і верш, прысвечаны юбіляру.

Фінальным акордам мерапрыемства стала аўтограф-сесія паэтэсы. Кожны атрымаў у падарунак аўтарскі паэзабуклет з памятным надпісам.