У 6-ты школьны дзень вучні 9-х класаў ДУА “Гімназія г. Дзяржынска” разам з настаўніцай беларускай мовы і літаратуры завіталі ў Дзяржынскую раённую бібліятэку на 155-гадовы юбілей пісьменніка-земляка Каруся Каганца. Яны сталі ўдзельнікамі літаратурнага квэста “Свяціў народу, пакуль мог”. Моладзь актыўна адказвала на пытанні, складвала пазлы, з натхненнем чытала вершаваныя радкі юбіляра і даведалася шмат цікавых фактаў пра жыццё і творчасць таленавітага земляка.

Цікава прайшоў паэтычны тур квэста – быў прэзентаваны паэзабуклет “Між стагоддзяў бруіцца крыніца Каруся Каганца – земляка”. Вучні пазнаёміліся з паэтычнымі творамі членаў Саюза пісьменнікаў Беларусі, удзельнікаў народнага літаратурнага клуба “Выток” Антона Анісовіча і Людмілы Круглік, прысвечанымі Карусю Каганцу. А адзін з вершаў прэзентавала моладзі аўтар – Аксана Яўгеньеўна Хацкевіч – настаўніца беларускай мовы і літаратуры, актыўная ўдзельніца “Вытока”. На памяць аб сустрэчы, кожны атрымаў падарунак – паэзабуклет “Вытока”.