У апошні дзень лютага ўдзельнікі народнага літаратурнага клуба “Выток” адправіліся ў творчую вандроўку на Уздзеншчыну. А нагодай для гэтага з’явілася юбілейная вечарына члена Саюза пісьменнікаў Беларусі Дзмітрыя Вінаградава, якая адбылася ў цэнтральнай раённай бібліятэцы імя Паўлюка Труса.

Даўнія творчыя стасункі “вытокаўцаў” з юбілярам дазволілі кожнаму з дзяржынскіх літаратараў – кіраўніку клуба Наталлі Лебядзеўскай, паэтам Аляксею Баранаву і Уладзіміру Слабейка, членам Саюза пісьменнікаў Беларусі Антону Анісовічу і Людміле Круглік – выказаць свае паэзапрысвячэнні шчыра і адметна. Музычную афарбоўку паэтычнаму букету віншаванняў надала член Беларускага Саюза музычных дзеячаў Тамара Кашчэва.

Памятным падарункам для кожнага ўдзельніка сустрэчы стала кніга юбіляра з яго аўтографам.