Вось ужо 34 гады мінула з дня чарнобыльскай трагедыі, якая стала  не толькі жорсткім выпрабаваннем для многіх тысяч людзей, але і своеасаблівым рубяжом, які падзяліў іх жыццё на «да» і «пасля»... 

26 красавіка 1986 года  Чарнобыльская АЭС стала сімвалам буйнейшай ў гісторыі чалавецтва тэхнагеннай катастрофы. Данінай памяці  ўсім ахвярам  катастрофы,  стала абвяшчэнне ААН  у 2016 годзе  даты  26 красавіка Міжнародным днём памяці аб Чарнобыльскай катастрофе.

Пра “неславутую ў свеце АЭС” сказана шмат: праведзены журналісцкія даследванні,  зняты дакументальныя і мастацкія фільмы, напісаны кнігі.

Першым з беларускіх пісьменнікаў, хто адлюстраваў гэтую падзею на старонках кнігі быў Народны пісьменнік Беларусі Іван Шамякін. Яго твор «Злая зорка» — першы ў беларускай літаратуры раман пра чарнобыльскую трагедыю. 

Зварот да тэмы чарнобыльскай бяды быў для Шамякіна не выпадковы.  Гэта была вялікая бяда і для ўсяго народа, і асабіста для пісьменніка. Ад яе пацярпела і малая радзіма  пісьменніка — Хойніцкі раён, і суседні з ім Брагінскі, якія разам з Лоеўскім і Рэчыцкім уваходзілі ў яго выбарчую акругу як дэпутата Вярхоўнага Савета БССР. Як успамінаў пазней сам пісьменнік, ён меў намер паехаць туды адразу ж пасля аварыі, але яго адгаварылі. «Паехаў першы раз у канцы мая. Пасля ездзілі з хойніцкімі хлопцамі, маімі маладымі сябрамі — Міколам Мятліцкім і Барысам Сачанкам. Трапілі на другое адсяленне: галасіла родная вёска Міколы –  Бабчын. І мы плакалі разам з жанчынамі, якія ўжо ведалі, што пакідаюць родныя хаты назаўсёды…”

Упершыню раман быў надрукаваны ў часопісе «Полымя» ў  1991 годзе. Асобным выданнем выйшаў праз два гады, у 1993-м. Ён хутка стаў папулярным. І гэта не дзіўна, бо  гісторыя галоўных герояў – гэта адлюстраванне лёсу, усіх тых, каго закранула Чарнобыльская трагедыя.  

Дзеянне рамана адбываецца ў адным з раёнаў  Гомельскай вобласці. Галоўны сюжэт твора – лёс  дзвюх сямей, Пыльчанка і Пустаход,  у час чарнобыльскай трагедыі. Гаспадароў сямей звязвае  “добрая і верная мужчынская дружба сталых людзей”. Пачынаецца раман з вяселля Глеба Пыльчанкі і Ірыны Пустаход. Глеб – інжынер на Чарнобыльскай АЭС і таму прама з вяселля ён адпраўляецца ў Чарнобыльскае пекла. Ірына – ўрач і, як ніхто іншы, разумее ўсю небяспечнасць радыяцыі. Але нічога не можа спыніць яе на шляху да мужа ў аварыйную зону. Яна яшчэ не ведае, што цяжарная і носіць пад сэрцам дзіця…

Непаўторны аўтарскі стыль і праўдзівае  адлюстраванне трагічных падзей у жыцці народа і  сёння прыцягвае ўвагу чытачоў да «Злой зоркі». І не дзіва, што гэты своеасаблівы мастацкі дакумент часу вытрымаў некалькі перавыданняў.

Парада дня:

“Будзь чалавекам. Наша місія – памагчы людзям ў бядзе.”

Будзьце здаровыя! Беражыце сябе! Да новых сустрэч з добрай кнігай!